Bolqarıstan mətbuatı Azərbaycanın 28 May – Respublika Günü barədə yazır

1

Bolqarıstanın aparıcı KİV-lərindən olan “Standart” informasiya agentliyinin internet səhifəsində “Azərbaycanda Respublika Günü qeyd olunur” başlığı ilə Azərbaycanın Bolqarıstandakı səfiri Nərgiz Qurbanovanın məqaləsi dərc olunub.

Herbiand.az saytı AZƏRTAC-a istinadla xəbər verir ki, məqalədə 1918-ci il mayın 28-də müsəlman və türk dünyasında ilk dünyəvi və parlamentar demokratiya olmuş Azərbaycan Xalq Cümhuriyyəti yaradılması barədə bəhs olunur. Cümhuriyyət Azərbaycanın etnik, dini, cinsi və sosial mənsubiyyətindən asılı olmayaraq hər bir vətəndaşının bütün mülki və siyasi hüquqlarını təmin edərək qadınlara bərabər seçki hüququ verən ilk müsəlman çoxluqlu ölkə olub, hətta bu məsələdə bir çox Avropa ölkəsini qabaqlayıb. 114 min kvadrat metr əraziyə malik, paytaxtı ilk olaraq Gəncədə yerləşən və sonradan Bakıya keçirilən Azərbaycan Xalq Cümhuriyyəti Birinci Dünya Müharibəsinin çox mürəkkəb daxili və beynəlxalq siyasi mühitində yaradılıb. Buna baxmayaraq, ölkə parlamenti və hökuməti bir çox mühüm qərarlar həyata keçirib, demokratik arzu və mütərəqqi mənəvi gücə malik ölkə liderləri yaxşı fəaliyyət göstərən demokratik dövlət və cəmiyyət qurmağa müvəffəq olublar.

Qeyd olunur ki, həm hökumətdə, həm də 11 fraksiyanı əhatə edən Milli Parlamentdə Azərbaycan Xalq Cümhuriyyətində yaşayan bütün millətlər təmsil olunmuşdur. Fəaliyyət göstərdiyi 2 il ərzində parlament tərəfindən 230 qanun qəbul edilib. Bundan əlavə, Azərbaycan Xalq Cümhüriyyətinin 3 rəngli bayrağının təsdiq edilməsi, hərbi qüvvələrinin yaradılması, Azərbaycan dilinin dövlət dili olaraq qəbul edilməsi, təhsil sistemində islahatların həyata keçirilməsi, Bakı Dövlət Universitetinin yaradılması, Azərbaycan mətbuatında yeniliklərin həyata keçirilməsi barədə bəhs edilir.

İqtisadi sahədə əldə olunan nailiyyətlər barədə söz açılaraq cümhuriyyət dövründə Bakı-Batumi neft kəmərinin bərpa olunduğu, Bakı-Culfa dəmir yolunun tikintisinin davam etdirildiyi, Azərbaycan Dövlət Bankının yaradıldığı və milli pul əskinaslarının dövriyyəyə buraxıldığı, eləcə də Xəzər Gəmiçiliyi Şirkətinin yaradıldığı qeyd olunur.

Əlimərdan bəy Topşubaşevin rəhbərlik etdiyi Azərbaycan nümayəndə heyətinin Paris Sülh Konfransında iştirakı və Azərbaycan Xalq Cümhuriyyətinin müstəqilliyinin de-fakto tanınmasına nail olunması barədə bəhs edilərək Cümhuriyyətin beynəlxalq səviyyədə tanınmasının təmin edilməsi üçün göstərilən səylər barədə məlumat verilir.

Prezident İlham Əliyevin rəhbərliyi ilə bugünkü Azərbaycanın öz tarixi ilə qürür duyan müasir, dünyəvi və müstəqil dövlət olduğu qeyd olunaraq ölkəmizin böyük arzularla gələcəyə baxdığını və multikultur cəmiyyətin inkişafı yolunda əmin addımlarla irəlilədiyi bildirilir. Azərbaycanın regional iqtisadi əməkdaşlığa, beynəlxalq sülh və təhlükəsizliyə, həmçinin mədəniyyətləarası dialoqa dünya miqyasında töhfə verməyə davam etdiyi vurğulanır.

Məqalədə, həmçinin Azərbaycan-Bolqarıstan münasibətlərinə toxunularaq Azərbaycanın bu münasibətləri gücləndirməkdə maraqlı olduğu və hər iki ölkənin səyləri nəticəsində ikitərəfli münasibətlərin strateji tərəfdaşlıq səviyyəsinə yüksəltməyə müvəffəq olduğu bildirilir.

Sonda, hazırda dünyada yayılmaqda olan COVID-19 virusu ilə bağlı Bolqarıstanda mövcud məhdudiyyətlər səbəbindən Azərbaycanın Bolqarıstandakı səfirliyi tərəfindən Azərbaycanın milli bayramı olan 28 May – Respublika Gününun təntənəli qeyd olunmasının mümkün olmadığı qeyd edilərək həmrəylik, birlik və qarşılıqlı dəstək hesabına bütün dünyada koronavirus pandemiyasına son qoyulacağına və növbəti illərdə Azərbaycanın milli bayramının Bolqarıstan da daxil olmaqla xarici ölkələrdə sevinclə qeyd olunacağına ümid ifadə edilir.

Səfir N.Qurbanovanın bu məqaləsi həmçinin “Diplomatik spektrum” online jurnalın internet səhifəsində də dərc olunub.

Azərbaycan Xalq Cümhuriyyətinin yaranması, fəaliyyəti, uğurları və nailiyyətləri, eləcə də onun müasir Azərbaycanın yaranmasında rolu barədə məlumat həmçinin böyük oxucu auditoriyasına malik Bolqarıstanın “Fokus” xəbər agentliyinin internet səhifəsində “28 may günü Dünya tarixində” adlı bölməsində yayılıb.

Şərh yaz