Prezident İlham Əliyevin sosial sahə ilə bağlı tapşırıqlarının icrası istiqamətində qarşıda duran vəzifələr müzakirə olunub

1

Prezident İlham Əliyevin sədrliyi ilə 2020-ci ilin birinci rübünün sosial-iqtisadi yekunlarına həsr olunan müşavirədə dövlət başçısının sosial sahə ilə bağlı verdiyi tapşırıqların icrası istiqamətində qarşıda duran vəzifələrə dair Əmək və Əhalinin Sosial Müdafiəsi Nazirliyində iclas keçirilib.
Əmək və Əhalinin Sosial Müdafiəsi naziri Sahil Babayev vurğulayıb ki, Prezident İlham Əliyevin siyasətinin mərkəzində vətəndaş rifahının təminatı prinsipi dayanır və bu gün pandemiya ilə əlaqədar ölkədə həyata keçirilən genişmiqyaslı dəstək tədbirləri bunu bir daha təsdiq edir. Müşavirədə dövlət başçısı deyib: “Sosial sahə bizim üçün həmişə prioritet olubdur, indiki şəraitdə ikiqat prioritet olmalıdır. Çünki son illərdə məşğulluq, sosial təminat istiqamətlərində böyük addımlar atılıb, ancaq indiki şəraitdə bu, xüsusi önəm daşıyır”.
Nazirliyinin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, nazir bildirib ki, Prezidentin tapşırıqlarının icrası istiqamətində müvafiq addımlar atılır. Əhalinin həssas qruplarına dəstək tədbirləri daha da gücləndirilib. Özünüməşğulluq proqramının genişləndirilməsi və proqrama cəlb olunanlara aktivlərin verilməsi prosesi davam edir. Artıq banklar tərəfindən də aktivlər təqdim edilir. Bu il 12 min ailənin özünüməşğulluq proqramında iştirakı təmin olunacaq. Həmçinin haqqı ödənilən ictimai işlərin miqyası genişlənir.
S.Babayev, eyni zamanda, özəl sektorda iş yerlərinin qorunması üçün məqsədyönlü işlər aparıldığını diqqətə çatdırıb. Qeyd edib ki, qeyri-dövlət sektorunda mövcud iş yerləri qorunub saxlanılmaqla, əmək müqavilələrinin sayı artmaqda davam edib. 2020-ci ilin 1 aprel tarixinə özəl sektorda əmək müqavilələrinin sayı 664119 olubsa, bu göstərici 715 mini ötüb. Beləliklə, qeyri-dövlət sektorunda əmək müqavilələrinin sayında 1 aprel tarixindən 51 min müqavilə, 1 yanvar tarixindən isə 73 min müqavilə artımı olub.
Nazir işini və qazancını itirmiş şəxslərə birdəfəlik ödəmənin verilməsi işlərinə aprelin 9-dan başlandığını deyib. İşsiz kimi qeydiyyata alınanlardan 120 min nəfər üçün birdəfəlik ödəmənin bank və poçt filiallarına köçürüldüyünü, bu istiqamətdə ödənişlərin gündəlik olaraq davam etdiyini bildirib.
S.Babayev aktiv məşğulluq tədbirlərinin gücləndirilməsi, ünvanlı dövlət sosial yardımı proqramının genişləndirilməsi və s. istiqamətlərdə aparılan işləri də qeyd edib.
İclasda Prezident İlham Əliyevin tapşırıqlarının icrası istiqamətində qarşıda duran vəzifələr müzakirə olunub.

Şərh yaz