Hüseyn İbrahimov: "COP29 Azərbaycanın qlobal iqlim gündəliyində rolunu daha da gücləndirəcək"

Sosial Mədəni Dəyişikliklərin Öyrənilməsi İctimai Birliyinin sədri Hüseyn İbrahimov: “COP29 Azərbaycanın qlobal iqlim gündəliyində rolunu daha da gücləndirəcək”

Sosial Mədəni Dəyişikliklərin Öyrənilməsi İctimai Birliyinin sədri Hüseyn İbrahimov ölkəmizdə keçirilən COP29 tədbirinin əhəmiyyəti ilə bağlı saytımıza açıqlama verib.

Hüseyn İbrahimov bildirib ki, COP29 kimi mötəbər beynəlxalq tədbirin Azərbaycanda keçirilməsi ölkəmizin qlobal iqlim dəyişmələri ilə mübarizədə fəal mövqe tutduğunu və beynəlxalq etimadın yüksək səviyyədə olduğunu göstərir. Onun sözlərinə görə, bu cür tədbirlər təkcə ekoloji məsələlərin müzakirəsi üçün platforma deyil, eyni zamanda ölkələrin əməkdaşlıq imkanlarının genişləndirilməsi baxımından da mühüm əhəmiyyət daşıyır.

İctimai Birliyin sədri qeyd edib ki, Azərbaycan son illərdə yaşıl enerji siyasətinə xüsusi önəm verir, bərpaolunan enerji mənbələrinin inkişafı istiqamətində mühüm layihələr həyata keçirir. COP29-un ölkəmizdə təşkili bu siyasətin beynəlxalq səviyyədə dəstəkləndiyini və Azərbaycanın qlobal iqlim təşəbbüslərində etibarlı tərəfdaş kimi qəbul olunduğunu bir daha təsdiqləyir.

Hüseyn İbrahimovun sözlərinə görə, COP29 çərçivəsində aparılan müzakirələr inkişaf etmiş və inkişaf etməkdə olan ölkələr arasında iqlim maliyyələşməsi, karbon emissiyalarının azaldılması və dayanıqlı inkişaf hədəfləri üzrə yeni əməkdaşlıq imkanlarının yaranmasına şərait yaradır. Bu isə qlobal iqlim böhranına qarşı birgə mübarizənin gücləndirilməsi baxımından xüsusi əhəmiyyət kəsb edir.

O vurğulayıb ki, Azərbaycanın bu cür mötəbər tədbirə ev sahibliyi etməsi ölkəmizin beynəlxalq nüfuzunu daha da artırır və regionda lider mövqeyini möhkəmləndirir. Eyni zamanda, COP29 çərçivəsində qəbul ediləcək qərarların gələcək nəsillər üçün daha təhlükəsiz və dayanıqlı ekoloji mühitin formalaşmasına töhfə verəcəyi gözlənilir.

Sonda Hüseyn İbrahimov qeyd edib ki, COP29 Azərbaycanın qlobal iqlim gündəliyində rolunu daha da gücləndirəcək və ölkəmizin beynəlxalq əməkdaşlıq platformalarında fəallığını yeni mərhələyə daşıyacaq.