Qızılın qiyməti 6000 dollara yüksələ bilər - PROQNOZ

Yaxın Şərqdəki münaqişənin iqtisadi artımı yavaşlatması və mərkəzi bankların pul siyasətini yumşaltması səbəbindən qızılın qiyməti 2027-ci ilin ortalarına qədər 6000 dollara yüksələcək.

Herbiand.az xəbər verir ki, bu proqnozla mərkəzi ofisi Avstraliyada yerləşən “ANZ Group Holdings” çoxmillətli bankçılıq və maliyyə xidmətləri şirkətinin analitikləri çıxış ediblər.

Ekspertlərin fikrincə, qiymətli metalların dəyəri növbəti 12 ayda üç mərhələdən keçəcək. Birinci ssenaridə xam neftin qiymətlərinin artması inflyasiya gözləntilərini artıracaq və ABŞ Federal Ehtiyat Sistemi sentyabr ayına qədər faiz dərəcələrini sabit saxlayaraq ehtiyatlı davranacaq. Bu, qızılın qiymətinə mənfi təsir göstərəcək. İkinci ssenaridə enerji böhranı iqtisadi artıma mənfi təsir göstərəcək, sənaye fəaliyyətini azaldacaq və istehlak xərclərini zəiflədəcək. Üçüncü ssenaridə isə iqtisadi artım yavaşladıqca mərkəzi banklar daha yumşaq pul siyasətinə keçəcək. Bu, qızılın qiymətini dəstəkləyəcək. Qısamüddətli perspektivdə bir troya unsiyasının qiymətinin 4500 dollar ətrafında qalması gözlənilir. Lakin qiymətdə azalma yeni mövqelər yaratmaq üçün fürsət yaradacaq.

Bank ilin sonuna qızıl qiyməti ilə bağlı proqnozunu 5800 dollardan 5600 dollara endirib. Həmçinin qızılın qiymətinin gələn ilin ortalarına qədər 6000 dollara çatacağını proqnozlaşdırılıb. Əvvəlki proqnozda isə bu göstəriciyə 2027-ci ilin əvvəlində çatılacağı gözlənilirdi.

“Maliyyə vəziyyətinin pisləşməsi, ABŞ dollarının davam edən diversifikasiyası və geosiyasi qeyri-müəyyənlik qızılın sığorta kimi rolunu gücləndirməyə davam edəcək. Bundan əlavə, Yaxın Şərq münaqişəsini nəzərə alaraq, mərkəzi banklar qızıl ehtiyatlarını strateji olaraq artırmağa davam edəcəklər”, - deyə bankın məlumatında bildirilir.