Əraqçi: ABŞ İran xalqına hörmət etməyincə irəliləyiş mümkün olmayacaq

İranın xarici işlər naziri Abbas Əraqçi ABŞ-la münasibətlərdə əsas problemin vasitəçilik deyil, Vaşinqtonun siyasəti olduğunu bildirib.

Herbiand.az xəbər verir ki, Abbas Əraqçi bu barədə İraqın Baş naziri Məhəmməd Şiya əs-Sudaninin Tehrana səfəri çərçivəsində jurnalistlərə açıqlamasında deyib.

"Bizim hazırda ABŞ-la vasitəçi problemimiz yoxdur. Problem Amerikanın yanaşmasıdır. Bu yanaşma qeyri-məntiqi, həddindən artıq iddialı və hegemon xarakter daşıyır. İran İslam Respublikası buna qətiyyətlə cavab verib", - deyə nazir bildirib.

Onun sözlərinə görə, ABŞ İran xalqına və onun milli maraqlarına hörmət etməkdən başqa yolun olmadığını anlamayana qədər iki ölkə arasında irəliləyiş üçün zəmin yaranmayacaq.

"Bu məsələ ilə bağlı hər hansı mesajlaşmaya ehtiyac yoxdur. ABŞ-ın öz siyasətinə yenidən baxması kifayətdir", - deyə Əraqçi vurğulayıb.