CNN: Putin və Tramp öz müharibələrində tələyə düşüb

ABŞ Mərkəzi Kəşfiyyat İdarəsinin (MKİ) rəhbəri Con Retkliffin bu həftə Moskvaya səfəri fonunda Rusiya və ABŞ prezidentləri Vladimir Putin və Donald Trampın oxşar dilemma ilə üzləşdiyi bildirilir.

CNN-in təhlilinə görə, hər iki lider hərbi məqsədlərinə tam nail ola bilmir, lakin geri çəkilmək də onların siyasi nüfuzuna ciddi zərbə vura bilər.

Nəşr yazır ki, Putin və Tramp Ukrayna və İranın qeyri-ənənəvi və asimmetrik müharibə taktikaları, xüsusilə də ucuz dron texnologiyalarından geniş istifadə fonunda gözlənilməz hərbi çətinliklərlə qarşılaşıblar.

CNN hesab edir ki, Rusiya və ABŞ xarici siyasətdə uzunmüddətli hərbi münaqişələrin yaratdığı problemlərlə əvvəllər də üzləşiblər. Nəşr Rusiya və ABŞ-ın Əfqanıstandakı müharibələrdə uğursuzluğunu, Ukraynadakı müharibəni isə ABŞ-ın Vyetnam təcrübəsini xatırladan vəziyyət kimi qiymətləndirir.