Kolumbiya narkokartelləri dron müharibəsini öyrənmək üçün Ukraynaya könüllülər göndərir

Kolumbiya narkotik kartelləri Ukraynanın dron texnologiyasına yiyələnməyə çalışır və bu məqsədlə öz adamlarını Ukrayna Müdafiə Qüvvələrinə könüllü olaraq göndərirlər.

Herbiand.az bildirir ki, bu barədə Financial Times qəzeti yazıb.

Son bir ildə Kolumbiya cinayətkar qruplarının Ukraynada dron müharibəsi texnikalarını öyrənmək üçün əsgər göndərməyə və bu bacarıqları geri qayıtdıqdan sonra öz ordularına qarşı istifadə etməyə çalışdıqları barədə dəfələrlə məlumatlar yayılıb.

Dronlar artıq Kolumbiya hökumətinin üsyançılar və narkotik qaçaqmalçıları ilə uzun müddətdir davam edən silahlı münaqişəsinin qaydalarını alt-üst edib. Cəngəllik partizanlarına qarşı mübarizədə hökumət həmişə səmada dominantlığa arxalana bilərdi, amma indi vəziyyət dəyişib.

Qəzet qeyd edib ki, keçən il Kolumbiya ordusu dron hücumlarının 96 faizini ya radiotezliklərə maneə törətməklə, ya da cihazları məhv etməklə zərərsizləşdirib: “Lakin indi qanunsuz qruplar Ukraynanın təcrübəsindən öyrənərək onları üstələməyə çalışır”.

Bəxtiyar CƏFƏRLİ