WSJ: Çin Rusiyanın reaktiv “Şahed” dronlarının istehsalında əsas rol oynayır

“Wall Street Journal”ın yazdığına görə, Rusiyanın Ukraynaya qarşı istifadə etdiyi yeni “Şahed” tipli reaktiv dronların hazırlanmasında Çin şirkətlərinin mühərrik və digər komponentlərlə təchizat baxımından mühüm rolu var.

Nəşr bildirir ki, yeni modellərin sürəti saatda 500 kilometrə çata bilir. Çin uzun müddətdir bu dronlar üçün mühərrik hissələri, servo mühərriklər və giroskoplar da daxil olmaqla müxtəlif komponentlərin əsas təchizatçılarından biri kimi çıxış edir.

Məlumata görə, İran “Şahed” dronlarını inkişaf etdirərkən müxtəlif ölkələrdən, o cümlədən Çindən komponentlər əldə edib. Qərb istehsalı olan bir sıra hissələrin də Çin və Honkonqdakı vasitəçi şirkətlər üzərindən İrana çatdırıldığı bildirilir.

“WSJ” yazır ki, Çin şirkətlərinin təchizat zəncirindəki rolu Rusiyanın daha sürətli reaktiv “Şahed” modellərini istehsal etməsinə də imkan yaradıb. Bu dronların Ukraynanın ənənəvi hava hücumundan müdafiə vasitələri üçün daha çətin hədəfə çevrildiyi qeyd olunur.

Ukrayna isə yeni təhlükəyə qarşı reaktiv mühərrikli tutucu dronlardan istifadəni genişləndirir. Bu sistemlərin əsas hədəfləri Rusiyanın “Geran-3”, “Geran-4” və “Geran-5” kimi reaktiv hücum dronlarıdır.