"Belarus Ukrayna ilə sərhəddə istehkam tikmir" - Müdafiə Naziri

Belarus müdafiə naziri Viktor Xrenin Belarusun Ukrayna ilə sərhəddə istehkam tikildiyi barədə iddiaları təkzib etdi.

BelTA xəbər agentliyinin məlumatına görə, jurnalistlərlə söhbətində nazir bu cür şayiələri Belarusa qarşı aparılan informasiya müharibəsi adlandırıb.

"Əlbəttə ki, bunu eşitmişik və buna təbəssümlə baxırıq. Hansısa müdafiə əraziləri hazırlamağımızla bağlı bu ifadələr... Biz bunun yalnız bir məqsədlə edildiyini çox yaxşı başa düşürük: cəmiyyətimizdə, eləcə də Ukrayna cəmiyyətində gərginlik yaratmaq, bizi qəzəbləndirmək və qatı düşmənə çevirmək. Bu, tamamilə yalandır", - deyə o bildirib.

Xrenin xatırladıb ki, Belarus prezidenti Aleksandr Lukaşenko əvvəllər respublika sərhədləri boyunca istehkam ərazilərinin tikintisi barədə əmr vermişdi. "Bu əmr yerinə yetirilib. Qərb və şimal sərhədləri boyunca beş istehkam ərazisi təchiz edilib və fəal şəkildə təkmilləşdirilir. Cənub sərhədində heç bir istehkam ərazisi və ya müdafiə xətti yaratmaq planı yoxdur", - deyə nazir izah edib.