Medvedev hazırkı Qərb siyasətçilərini mənəvi cəhətdən aciz adlandırıb

Rusiya Təhlükəsizlik Şurasının sədr müavini Dmitri Medvedev Qərb siyasi elitasında nəsil dəyişikliyindən danışıb. O, praqmatik liderlər dövrünün bitdiyini, onların yerini aşağı əxlaqi xarakterli insanların tutduğunu bildirib.

Herbiand.az xəbər verir ki, Medvedev bu barədə "Yujnaya Osetiya" nəşrinə verdiyi müsahibədə deyib.

"Təəssüf ki, praqmatik Qərb siyasətçiləri nəsli getdi və onların yerini - gəlin hər şeyi öz adı ilə adlandıraq - mənəvi cəhətdən aciz insanlar tutub", - siyasətçi bildirib.

O, müasir Qərb liderlərinin sələflərindən nəzərəçarpacaq dərəcədə aşağı səviyyədə olduğunu qeyd edib. Medvedev 2008-ci ilin avqust hadisələrini xatırladıb, o zaman Gürcüstan-Cənubi Osetiya münaqişəsi ətrafında vəziyyət fərqli şəkildə həll olunmuşdu.

Həmin günləri analiz edən Təhlükəsizlik Şurasının sədr müavini qeyd edib ki, o dövrdə Qərb əleyhdarları arasında soyuq praqmatizm hökm sürürdü. Onlar qlobal problemlərin Rusiyanın iştirakı olmadan həll edilə bilməyəcəyini anlayaraq mövcud şəraitlə barışmağa məcbur oldular. Medvedev bunların arasında beynəlxalq təhlükəsizlik, tərksilah, iqlim dəyişikliyi, terrorizm və narkotik qaçaqmalçılığı ilə mübarizə məsələlərini misal çəkib.

Bəxtiyar CƏFƏRLİ