Paşinyan: Ermənistan dəmir yollarının konsessiyası ilə bağlı Rusiya ilə sərt qərarlar qəbul etməyəcəyik

Ermənistanın Baş naziri Nikol Paşinyan ölkəsinin dəmir yollarının konsessiya idarəçiliyi məsələsində Rusiya ilə sərt qərarlar qəbul etmək niyyətində olmadığını bildirib.

Paşinyan bu barədə hökumətin iclasından sonra jurnalistlərə açıqlamasında danışıb. Baş nazir məsələnin qarşılıqlı anlaşma və tərəflərin maraqlarının nəzərə alınması əsasında, dostcasına həll edilməsinin tərəfdarı olduğunu vurğulayıb.

Onun sözlərinə görə, mümkün variantlardan biri Rusiyanın konsessiya hüquqlarının tam və ya qismən satılmasıdır. Paşinyan bildirib ki, səhmlərin müxtəlif nisbətlərdə bölüşdürülməsi ilə bağlı alternativ modellər də nəzərdən keçirilə bilər.

Baş nazirin fikrincə, əsas məqsəd Ermənistanın beynəlxalq nəqliyyat şəbəkəsinə inteqrasiyası üçün yaranmış tarixi imkanın qarşısının alınmamasıdır.

Qeyd edək ki, Paşinyan 2026-cı ilin mayında Ermənistan dəmir yollarının konsessiya idarəçiliyi modelinin dəyişdirilməsinin vacibliyini bildirmişdi. O, mövcud sistemin tətbiqinə görə Rusiyaya qarşı sanksiyaların Ermənistanın dəmir yolu infrastrukturunun inkişafına maneə yarada biləcəyini qeyd etmişdi.

Hazırda Ermənistan dəmir yollarının konsessiya idarəçiliyi Rusiyanın “Cənubi Qafqaz Dəmir Yolları” şirkəti tərəfindən həyata keçirilir.

Paşinyan daha əvvəl bu məsələyə münasibət bildirərkən Rusiyanın konsessiya idarəçiliyinin Ermənistanı müəyyən rəqabət üstünlüklərindən məhrum etdiyini deyib. O, konsessiyanın Ermənistan və Rusiya üçün dost münasibətlərə malik üçüncü ölkəyə verilməsi variantını da irəli sürüb.

Lakin bir sıra Rusiya rəsmiləri dəmir yollarının konsessiya idarəçiliyinin üçüncü ölkəyə ötürülməsini məqsədəuyğun hesab etmədiklərini açıqlayıblar.