Zaxarova: Kiyev MAQATE rəhbərinin Zaporojye AES-ə səfərini pozub

Kiyev hakimiyyəti MAQATE-nin baş direktoru Rafael Qrossinin Zaporojye Atom Elektrik Stansiyasına planlaşdırılan səfərini pozub.

Herbiand.az xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova bildirib.

Səfər 20-21 avqust tarixlərinə planlaşdırılıb və agentlik katibliyinin mütəxəssislərinin stansiyada son rotasiyası ilə üst-üstə düşüb.

"Ukraynanın MAQATE-nin baş direktoru Rafael Qrossinin Zaporojye Atom Elektrik Stansiyasına və nüvə sənayesi şəhəri olan Enerqodar şəhərinə 20-21 avqust tarixlərinə planlaşdırılan səfərini pozmaq qərarı növbəti ağılsız bir addım idi", - Zaxarova nazirliyin saytında bildirib.

Onun sözlərinə görə, səfərin təfərrüatları tam şəkildə həll edilib və Moskva lazımi təhlükəsizlik zəmanətlərini verib. Lakin Ukrayna tərəfi açıq şəkildə MAQATE-nin baş direktorunun təhlükəsizliyinə zəmanət verə bilməyəcəyi ilə hədələyib.

Bəxtiyar CƏFƏRLİ