Rusiyanın 41-ci ordusunun qərargahının polkovnik-leytenantı raket zərbəsi nəticəsində öldürülüb

Rusiya Silahlı Qüvvələrinin 41-ci Qvardiya Ümumqoşun ordusunun qərargahında xidmət edən polkovnik-leytenant Andrey Moiseyenko avqustun 26-da müvəqqəti işğal altında olan Donetsk şəhərinə endirilən raket zərbəsi nəticəsində öldürülüb.

Ordu.az xəbər verir ki, bu barədə “Killed in Ukraine” OSINT layihəsi məlumat yayıb.

Məlumata görə, öldürülən işğalçı 41-ci Qvardiya Ümumqoşun ordusunun Baş Qərargahının Əməliyyat İdarəsində baş zabit vəzifəsində çalışıb.

Layihənin məlumatına görə, Moiseyenkonun həyat yoldaşı onun Ukrayna Hərbi Hava Qüvvələrinin Donetsk şəhərində Rusiya ordusunun komanda məntəqələrinə endirdiyi zərbə nəticəsində öldüyünü təsdiqləyib.

Ukrayna Baş Qərargahı zərbələrin bu istiqamətdə fəaliyyət göstərən düşmənin əsas və ehtiyat komanda məntəqələrini hədəf aldığını bildirib.

Ukrayna təyyarələrindən buraxılan qanadlı raketlər Donetskdə tikintisi başa çatdırılmamış yaşayış kompleksinin ərazisindəki avtomobil dayanacağına və keçmiş “UkrDerjNDİplastmas” elmi-tədqiqat institutunun binasına zərbələr endirib.

Rusiya ordusu böyük ərazilərə və qorunan yeraltı sahələrə malik olduqları üçün işğal olunmuş ərazilərdəki oxşar obyektlərdən dəfələrlə öz məqsədləri üçün istifadə edib.

Ukrayna komandanlığı bu zərbə zamanı Hərbi Hava Qüvvələri tərəfindən istifadə olunan raketlərin dəqiq tipini açıqlamayıb.