ŞƏT sammitində Azərbaycanın rolu

Bişkek, 31 avqust 2026-cı il

Qırğızıstanın paytaxtı Bişkek bu gün Şanxay Əməkdaşlıq Təşkilatının (ŞƏT) növbəti Zirvə toplantısına ev sahibliyi edir. 17 ölkənin dövlət və hökumət başçılarını, həmçinin BMT Baş katibi Antonio Quterreşi bir araya gətirən bu möhtəşəm diplomatik tədbirdə Azərbaycan Prezidenti İlham Əliyevin iştirakı xüsusi diqqət çəkir. Çin, Rusiya, Hindistan, İran, Türkiyə, Qazaxıstan, Özbəkistan kimi Avrasiyanın aparıcı güclərinin liderləri ilə eyni masa arxasında yer alması Azərbaycanın regional və beynəlxalq arenada get-gedə güclənən mövqeyinin növbəti təsdiqidir.

Ölkəmiz dialoq tərəfdaşından fəal iştirakçıya çevrilmişdir.

Azərbaycan 2015-ci ildən ŞƏT-in dialoq tərəfdaşı statusunu daşıyır, lakin son illər Bakı bu platformadan Avrasiya əlaqələndirilməsində öz rolunu təbliğ etmək üçün getdikcə daha fəal şəkildə istifadə edir. Sammit ərəfəsində aparılan təhlillərdə vurğulanır ki, Azərbaycanın Mərkəzi Asiya, Qafqaz və Avropa bazarları arasında körpü rolunu oynaması, Orta Dəhliz layihəsindəki mövqeyi ilə birlikdə, ölkəni ŞƏT çərçivəsindəki müzakirələrin təbii iştirakçısına çevirib.

Qırğızıstanla strateji tərəfdaşlıq yeni səviyyəyə qalxıb.

Əliyevin Bişkekə səfəri təsadüfi deyil . 2026-cı ilin iyulunda Azərbaycan Prezidentinin Qırğızıstana dövlət səfəri zamanı iki ölkə Alyans Münasibətləri haqqında Müqavilə imzalayaraq ikitərəfli əlaqələri ən yüksək formal səviyyəyə qaldırıb. Bu saziş enerji, nəqliyyat, kibertəhlükəsizlik, təhsil, maliyyə bazarlarının tənzimlənməsi və qiymətli metalların dövriyyəsi kimi geniş sahələri əhatə edir. İyulda imzalanan bu alyans müqaviləsi çərçivə yaratmışdısa, ŞƏT sammiti indi bu siyasi yaxınlaşmanı daha dərin əlaqələndirmə, investisiya və regional təsirə çevirmək üçün geniş Avrasiya səhnəsi təqdim edir.

Sülh diplomatiyası da diqqət mərkəzindədir.

Sammit çərçivəsində Prezident İlham Əliyev Ermənistan Baş naziri Nikol Paşinyanla da görüş keçirib. Tərəflər 2025-ci il Vaşinqton Sülh Zirvəsinin nəticələrinin, o cümlədən sülh sazişinin razılaşdırılmış mətninin paraflanmasının əhəmiyyətini bir daha vurğulayıblar. Bu görüş göstərir ki, Azərbaycan təkcə iqtisadi əlaqələndirmə deyil, həm də regional sülh və təhlükəsizlik arxitekturasının formalaşdırılmasında da aparıcı rol oynayır.

Nəticə olaraq vurğulamaq lazımdır ki,

Bişkekdəki ŞƏT sammiti Azərbaycanın xarici siyasətində yeni bir mərhələni əks etdirir: ölkə artıq sadəcə regional oyunçu deyil, Avrasiyanın nəqliyyat, enerji və təhlükəsizlik arxitekturasının formalaşdırılmasında fəal iştirakçı kimi çıxış edir. Qırğızıstanla imzalanan alyans müqaviləsi, Orta Dəhlizdəki strateji mövqe və sülh prosesindəki fəal rolu - bütün bunlar Azərbaycanın beynəlxalq nüfuzunun ardıcıl şəkildə artdığını göstərir.

Əfsanə İbrahimova, YAP-nın gənc fəalı