Tankların böyükmiqyaslı irəliləyişi dövrü keçmişdə qaldı

Müdafiəni yarmaq üçün böyük qüvvələrin cəmləşməsinə əsaslanan köhnə müharibə üsulları öz aktuallığını tamamilə itirib. Pilotsuz texnikalar döyüş meydanını o qədər dəyişdirib ki, onilliklər ərzində zabitlərə öyrədilən bir çox prinsiplər artıq işləmir.

Herbiand.az xəbər verir ki, bu barədə Rusiya Müdafiə Nazirliyinin Könüllülük korpusunun hərbi-siyasi işlər üzrə komandir müavini Anatoli Bibilov bildirib.

Onun sözlərinə görə, havada, quruda və suda işləyən pilotsuz sistemlərin yayılması hərbi taktikaların dəyişdirilməsində həlledici rol oynayıb. Bibilov bir saat ərzində bütün zirehli texnikanın tamamilə məhv edilməsi ilə başa çatan əvvəlcədən planlaşdırılmış tank hücumunin təsvir olunmasını misal çəkib. O hesab edir ki, belə bir şəraitdə irəliləyişlərin təşkili üçün əvvəlki üsullara qayıtmaq cəhdləri sadəcə mənasızdır.

Komandir müavini qeyd edib ki, tankların özlərinin rolu da əhəmiyyətli dərəcədə dəyişib: “Genişmiqyaslı hücum əməliyyatlarında iştirak etmək əvəzinə, onlar indi qapalı mövqelərdən düşmənə atəş açmaq üçün istifadə olunur”.

Bibilov hərbi işlərin daha da inkişafını robot texnologiyalarının, avtomatlaşdırılmış sistemlərin və ekipajsız işləyə bilən nəqliyyat vasitələrinin geniş istifadəsi ilə əlaqələndirir: “Bu texnologiyalar qarşıdakı illərdə döyüşün təbiətinə getdikcə daha çox təsir göstərə bilər. Lakin onlar piyadaları döyüş meydanından tamamilə sıxışdıra bilməyəcək. Əminəm ki, silahlı qüvvələrin bu qolu orduda öz yerini qoruyub saxlayacaq”.

Bəxtiyar CƏFƏRLİ