Hulusi Kılıç: Azərbaycan Avrasiyada dialoqun əvəzolunmaz iştirakçısına çevrilib

Şanxay Əməkdaşlıq Təşkilatının (ŞƏT) sammitində beş türk dövlətinin liderinin iştirakı Bişkekdə müzakirə olunacaq gündəmə xüsusi əhəmiyyət verəcək.

Bunu Türkiyənin Azərbaycandakı sabiq səfiri, İMZA Sosial İnkişafa Dəstək İctimai Birliyinin Türkiyədəki nümayəndəsi Hulusi Kılıç AZƏRTAC-ın müxbirinə müsahibəsində deyib.

Sabiq səfir beynəlxalq arenada ŞƏT-ə marağın artmasına diqqət çəkərək, 1996-cı ildə təşkilatın təməlini cəmi beş dövlətin qoyduğunu xatırladıb.

H.Kılıç Azərbaycan Prezidenti İlham Əliyevin Bişkekdə keçiriləcək tədbirlərdə iştirakının əhəmiyyətini qeyd edib, Bakının xarici siyasətinin, ŞƏT ölkələri ilə qarşılıqlı fəaliyyətin töhfə verdiyi istiqamətlərini diqqətə çatdırıb.

“Azərbaycan bu gün Mərkəzi Asiya ölkələri ilə sıx əməkdaşlıq edir. Bakının bu dövlətlərlə növbəti ümumi platformada təmsil olunması, şübhəsiz ki, qarşılıqlı fəaliyyət formatını stimullaşdırır”, - deyə Türkiyənin sabiq səfiri qeyd edib.

Onun sözlərinə görə, ŞƏT sammitində müzakirələrin mühüm mövzularından biri Avrasiyada, o cümlədən Orta Dəhliz və onun tərkib hissəsi olan Zəngəzur dəhlizi üzrə nəqliyyat-logistika kommunikasiyalarının inkişafı olacaq.

“ŞƏT platforması Avropa ilə Asiya arasında əlaqələrin möhkəmləndirilməsi üçün mühüm əhəmiyyət daşıyır. Bu isə Azərbaycanla Türkiyənin töhfəsi və dəstəyi olmadan mümkün deyil. Azərbaycanın regionda nüfuzunun artması Bakını Avrasiyada dialoqun əvəzolunmaz iştirakçısına çevirib. Prezidentlər İlham Əliyev və Rəcəb Tayyib Ərdoğanın Bişkekdə keçiriləcək sammitdə iştirakı iki qardaş ölkənin xarici siyasət kurslarının bir-birini tamamladığını göstərir”, - deyə İMZA birliyinin nümayəndəsi əminliyini ifadə edib.

Sabiq səfir Bişkekdə keçiriləcək müzakirələrin Ankara və Bakı üçün yalnız ŞƏT ölkələri ilə dialoq imkanı deyil, həm də Türk dünyasının geosiyasi əlaqələr platformasının möhkəmləndirilməsinə töhfə olacağını vurğulayıb.

Bununla yanaşı, o, Türkiyə liderinin ŞƏT-in ikigünlük müzakirələrində iştirakını NATO, Avropa İttifaqı və ümumilikdə Qərblə əməkdaşlığa paralel olaraq Türk dünyası və Avrasiyanın digər ölkələri ilə dialoqu inkişaf etdirən Ankaranın çoxvektorlu diplomatiyasının göstəricisi adlandırıb. “Türkiyə üçün ŞƏT sammiti ikitərəfli və çoxtərəfli əsasda diplomatik əlaqələri dərinləşdirmək imkanıdır”, – deyə H.Kılıç qeyd edib.

Türkiyənin sabiq səfirinin fikrincə, ŞƏT sammiti həm də qlobal siyasətdə çoxqütblülüyə üstünlük verilən və beynəlxalq münasibətlərin mərkəzi oxu kimi Qərbə yönəlməkdən imtina edilən yeni reallıqların nümayişidir.

“ŞƏT yalnız müasir dövrün çağırış və təhdidlərinin müzakirə formatı deyil, həm də Avrasiyada yeni əlaqələrin qurulması üçün platformadır. Türkiyə prizmasından söhbət Şərqlə yaxınlaşmadan gedir, lakin bu, Qərblə dialoqa zərər gətirməməlidir. Azərbaycan üçün prioritet geosiyasi nüfuzunu artırmaqdır”, – deyən H.Kılıç fikirlərini yekunlaşdırıb.