Seutaya qanunsuz daxil olan miqrantların əksəriyyəti Mərakeşə qaytarılıb

İspaniyanın Seuta muxtar şəhərinə qanunsuz yolla daxil olan miqrantların demək olar ki, hamısı artıq Mərakeşə qaytarılıb.

Bu barədə İspaniya Xarici İşlər Nazirliyi açıqlama yayıb.

Nazirlik bildirib ki, iyulun 30-da Seutaya qanunsuz keçid edən şəxslərin böyük əksəriyyəti artıq Mərakeşə geri göndərilib.

Rəsmi açıqlamada vurğulanıb ki, Seuta və Melilya muxtar şəhərləri vasitəsilə İspaniyaya qanunsuz daxil olmaq həmin şəxslərə ölkədə qalmaq, İspaniyanın materik hissəsinə keçmək və ya Avropa İttifaqı daxilində sərbəst hərəkət etmək hüququ vermir.

Miqrasiya axınının qarşısını almaq məqsədilə Seuta sahillərində uzunluğu 500 metr olan üzən baryer quraşdırılıb.

Xatırladaq ki, iyulun sonunda minlərlə miqrant Mərakeşdən Seutaya üzərək və ya piyada keçərək daxil olmağa cəhd edib. Böhranın pik dövründə İspaniya hökuməti şəhərdə təhlükəsizliyin təmin edilməsi üçün əlavə hərbi qüvvələr yerləşdirib.

Rəsmi məlumatlara əsasən, Seutaya çatmağa çalışarkən azı 88 nəfər həyatını itirib.

Afrikanın şimal sahilində yerləşən, lakin İspaniyaya məxsus olan Seuta uzun illərdir Afrikadan Avropaya əsas miqrasiya marşrutlarından biri hesab olunur. Şəhər Mərakeşdən sərhəd baryeri ilə ayrılsa da, Avropa İttifaqının xarici sərhədi olması səbəbindən minlərlə miqrant üçün cəlbedici keçid nöqtəsi olaraq qalır.

Seutada baş verən son hadisələr Avropada sərhəd təhlükəsizliyi, qanunsuz miqrasiya, sığınacaq siyasəti və miqrasiyanın əsas səbəblərinin aradan qaldırılması ilə bağlı müzakirələri yenidən gündəmə gətirib.