Fransa nüvə tədqiqatlarına 18 milyon avro maliyyə vəsaiti ayırıb

Fransanın Milli Elmi Tədqiqatlar Mərkəzi (CNRS) parçalanma nüvəsi (fission) üzrə elmi tədqiqatların inkişafına yönəlmiş yeni proqramın başladığını açıqlayıb. 2026–2031-ci illəri əhatə edən proqram üçün altı il ərzində 18 milyon avro ayrılacaq.

Herbiand.az xəbər verir ki, France 2030 planı çərçivəsində dövlət tərəfindən maliyyələşdirilən və Milli Tədqiqat Agentliyi (ANR) tərəfindən həyata keçiriləcək proqramın məqsədi mövcud və gələcək nüvə parçalanması texnologiyalarının inkişafı üçün zəruri elmi bilikləri gücləndirməkdir.

Ayrılan vəsaitin yarısı insan resurslarına, o cümlədən doktorantura və postdoktorantura proqramlarına yönəldiləcək. Digər yarısı isə hissəcik sürətləndiriciləri, eksperimental reaktorlar və radiokimya laboratoriyaları kimi elmi avadanlıq və tədqiqat infrastrukturlarının maliyyələşdirilməsinə sərf olunacaq.

Proqram fundamental və tətbiqi tədqiqatlar arasında əlaqə yaradan ilkin elmi-tədqiqat yanaşmasına əsaslanır. Araşdırmaların nüvə qurğularının təhlükəsizliyinin və səmərəliliyinin artırılmasına, radioaktiv material və tullantıların idarə edilməsinin optimallaşdırılmasına, həmçinin yeni nəsil reaktorların hazırlanmasına töhfə verməsi nəzərdə tutulur.

Layihədə nüvə fizikası, kimya, radiokimya, materialşünaslıq, termodinamika və rəqəmsal modelləşdirmə kimi müxtəlif elmi sahələr əhatə olunacaq.

CNRS proqramının Fransanın nüvə sahəsində elmi-tədqiqat potensialını və “elmi suverenliyini” gücləndirmək, həmçinin ölkənin nüvə parçalanması üzrə dünyanın aparıcı tədqiqat mərkəzlərindən biri olaraq, mövqeyini qorumaq məqsədi daşıdığı bildirilir. Proqram “France 2030” planına daxildir. Məlumata görə, bu plan strateji hesab edilən sahələrə ümumilikdə 54 milyard avro investisiya nəzərdə tutur və fundamental tədqiqatlardan sənaye istehsalına qədər innovasiyaların dəstəklənməsini hədəfləyir.