Putin və Paşinyan Ermənistanın Aİ-yə daxil olması ilə bağlı görüş keçirəcəklər

Rusiya Prezidenti Vladimir Putin və Ermənistanın Baş naziri Nikol Paşinyan Bişkekdə keçirilən ŞƏT sammiti zamanı İrəvanın Avropa İttifaqına qoşulmaq niyyəti və bu addımın bütün mümkün nəticələri ilə bağlı məsələləri müzakirə etmək üçün ayrıca ikitərəfli görüş keçirmək barədə razılığa gəliblər.

Herbiand.az xəbər verir ki, bu barədə Rusiya xarici işlər naziri Sergey Lavrov Beynəlxalq Gənclər Festivalındakı çıxışı zamanı bildirib.

Lavrovun sözlərinə görə, Moskva İrəvanın tərəfdaş seçimində və inkişaf istiqamətlərində mane olmaq niyyətində deyil. O, vurğulayıb ki, Rusiya Ermənistanın Aİ-yə daxil olmasına hazırlıqlarını ölkənin Avrasiya İqtisadi Birliyi (AİB) çərçivəsində aldığı əhəmiyyətli üstünlüklər hesabına maliyyələşdirməyə hazır deyil.

Nazir bu mövqeyi "olduqca açıq" adlandırıb: "Lakin, bütün yuxarıda qeyd olunanlara və digər aspektlərə baxmayaraq, Prezident Putin və Baş nazir Paşinyan Bişkekdə görüşdülər. Onlar xüsusi, ayrıca ikitərəfli görüş keçirmək və bütün bunları açıq şəkildə müzakirə etmək barədə razılığa gəliblər".

Bəxtiyar CƏFƏRLİ